8個對自己好啲貼士 x 世界精神健康日 2022|World Mental Health Day 2022

Categories: Social
Posted: January 16, 2023

你有無照顧好自己?

趁10月10日世界精神健康日,試下對自己好啲

(建議:試下Play段片,聽著柔和音樂睇文章)

每年的10月10日都是世界精神健康日,又稱世界精神衛生日(英文:World Mental Health Day),旨在提升大眾對精神健康的認識,呼籲各位向身邊有需要的人伸出援手。

2022年世界精神健康日主題「Make Mental Health & Well-Being for All a Global Priority」

Illustrated background image of hands and hearts and with the text "Mental health care for all: let's make it a reality".
圖片轉自:World Health Organization

香港人,你有無照顧好自己?

自肺炎疫情爆發以來,香港人都減少外出次數,亦不能如過往一樣閒時都可以飛去旅行減壓!

不過!最近終於有新消息,相信有很多人都忙於搶機票,盡快請假兼清假飛一轉!

無論你成功買到機票定搶不到機票,抑或想「等多陣,睇定啲」先飛都好,相信這幾年來「大家都攰喇……」始終抗疫壓力、生活壓力和經濟壓力都容易令人「鬱住鬱住,易鬱到病」,導致身心健康都變差,

香港人,不如趁2022年10月10日世界精神健康日,學識錫自己、對自己好一點?

貼士一:講出自己感受

個腦太多嘢諗會爆炸,試下講出口、形容一下當刻感覺,等對方知道你諗緊乜、有咩感受,千其唔好鬱喺心。

 

貼士二:做運動,郁多啲

做運動令身體釋放腦內分泌物-安多酚(Endorphin),有助控制情緒及調節免疫系統細胞。當運動變成一種習慣,絕對有助改善身體狀況及加強自信心;最重要係提升專注力、亦會令你瞓得好啲,自然有Good Mood!如果返工無時間去Gym Room,一於放工選擇行多啲,郁多啲亦可以。

 

貼士三:識食,都要食得健康

你個大腦需要各種營養先可以function得好,選擇食多啲堅果(杏仁、核桃、腰果和花生)、牛油果、豆、水果、蔬菜、充滿Omega-3食物以及飲夠水!而且,請你盡量避免吸收過量咖啡因、飲太多高糖飲品及酒精。(如有其他疾病需要指定飲食習慣,記得聽返醫生講。)

 

貼士四:飲酒都要理性

飲酒Relax,明白嘅,最緊要識得點到即止。

但若果你因為感到恐懼、孤獨而飲酒,你只會越飲越寒、越飲越Lonely。最慘係當酒精散晒後,你會感到更加空虛、容易越飲越多、更依賴酒精,進入無限輪迴……然後,你重要面對宿醉帶嚟嘅各種身體不適,身心只會更加唔舒服、更攰。所以,絕對唔建議用酒去控制情緒。

 

貼士五:與家人、好友保持聯絡

唔好匿埋唔見人,有人愛你!

充滿愛嘅家庭及朋友係你嘅強大後盾,佢哋對你嘅支持相當重要、甚至同你分享另一種睇法去了解世事或你個腦、一齊諗方法解決問題等。要好好同佢哋保持聯絡,就算唔可以見面,你都可以打電話、開個Facetime或Telegram傾下偈、吹吹水、自然feel good!記得你係要同Supportive嘅朋友保持聯絡,而唔係傷害你精神健康嘅朋友。你有得揀,都要識得揀!

 

貼士六:I am what I am,學識接受自己,如果頂唔順就去求助!

「人比人,比死人」。每個人都係獨立個體,總有自己嘅專長同短處,嘗試接受自己嘅能力、鼓勵自己學新嘢。與其日日上Social Media睇其他人生活有幾精彩,不斷比較搞到傷自尊心,不如花多啲時間增值自己。世界其實好大,出去擴闊眼界;做返自己,自然識到志同道合朋友。

而且無人係超人,抗壓力係有限制。如果覺得自己頂唔順,記得搵人幫手-搵屋企人、搵朋友、搵志願團體、搵本地機構等。求助唔係一種軟弱行為,而係一種勇氣,因為你肯面對眼前呢個難題,亦願意去克服。

相關推介:

照顧者支援平台

婦女求助熱線

 

貼士七:抖一抖,Enjoy ME TIME

當情緒波動時,畀自己一個Break。

5分鐘深呼吸練習又好、15分鐘飲杯水亦好、30分鐘睇套劇都好,暫時畀自己靜一下,搵其他嘢做或離開目前地方,畀自己減下壓,享受「Me Time」,做自己鍾意、勝任嘅事,自然享受亦做得開心。有時欣賞自己、讚下自己做得好,係應該的。如果真係太攰,不如恰一恰,充足電再繼續上路。

相關推介:

5個手機APP練習靜觀

ASMR Youtube影片推介

文學散步

 

貼士八:關心他人,助人如助己

幫人,其實係幫緊自己。你可以透過義工活動走入社區,幫助有需要人士,同時亦可以認識新朋友。

例如你領養咗一隻貓,倒頭來可能係佢領養咗你;

例如你去狗場做義工貓舍做義工,自然識到愛狗之人或貓奴;而且你用愛對毛孩,毛孩亦會對你表達愛。

唔好因為自己精神健康差而睇少自己,你肯幫自己,自然有人會幫你。

相關文章:

4個照顧自己和身邊人的生活貼士|實現SDG目標3:良好的健康與福祉

【拯救動物】動物義工有幾多種?一定唔只貓義工、狗義工

 

關心自己體重之餘

亦都要留意自己嘅精神健康

錫自己多啲啦

香港人